Samu't saring araw

Sa aking titulo ay magtataka kayo, ano na naman kaya ito? Hindi po Linggo ng Wika pero aking mailalahad ng maayos itong entry na ito sa ating wikang Filipino, at siyempre mas inyong ikakasiya at ikakagalak.

Simula pa noong isang araw ay akin nang pinag-iisipan anu-ano ba ang gamit at saysay ng ating haring araw (in English, sun). Aking naitanong ito sa aking sarili ng isang hapon ay aking linisin ang kuwarto ng aming kasambahay na matapos magbakasyon sa kanilang probinsiya ay nagpasabi na hindi na raw babalik. Isa sa aking nilinis ay ang kanyang tulugang kama. Isa sa mga bagay na natutunan ko sa aking ina ay dapat daw laging ibinibilad ang mga kutson at unan. Ito naman ay may scientific na katutuhanan sapagkat ang init ng araw, or anumang init, ay nakakamatay/nakakabawas ng mikrobyo.

Kaya habang napapaisip ako, anu-ano pa ba ang silbi ng araw o may mga bagay ba na may kaugnayan ang araw sa ating pang-araw-araw na buhay. Eto ang mga ilan sa aking naisip (ang ibang ay pwedeng walang katutuhanan, bagkus ay kasabihan lang ng matatanda na ating namana at pwedeng pinaniwalaan):

1. Mainam daw na ibilad sa araw ang bagong silang na sanggol, dahil "may vitamin D" daw ang umagang sinag ng araw. May katutuhanan ito pero hindi ang araw ang may vitamin D.

2. Noong araw sa aming probinsiya, nakikita ko ang ilang matatanda na ang baterya ng kanilang transistor ay ibinibilad nila sa tirik na sikat ng araw sa tanghali. Ito raw ay para ma-recharge ang baterya. Okay fine, hindi pa uso nun ang rechargeable batteries, at puro Eveready pa nun. ;)

3. Sa probinsiya ulit, na huli kong nakita sa Cagayan at Isabela nung isang taon, ay ibinibilad ang palay sa national highway! Na kalahati ng kalsada ay sakop nila. Para daw mas madaling matuyo ang palay.

4. Wag daw maglalaro sa init ng araw, lalo na sa tanghali, at kukutuhin ka daw. Hayz, mga lola, hindi nyo ba alam na ang mga kalaro ng mga apo nyo ay may mga kuto na, kaya maski gabi sila mag Chinese garter at tumbang preso (meron pa ba nitong naglalaro?!) ay magkakakuto sila. Grrrr.....

5. Eto tutoo, pag may solar eclipse wag kang diretsong titingin sa araw at nakakasira ng mata. E maski naman walang eclipse e hindi ka rin makakatingin ng diretso sa araw, di ba?

6. Ang bungang araw ba ay bunga talaga ng araw?

7. Natatawa ako dati sa mga kakilala ko na nag pa-facial, takot na takot sa araw. Para silang aswang at bampira na ayaw na ayaw sa sikat ng araw. Tulad sa pelikula na matutunaw o mag-aapoy sila pag nadilaan ng araw ang mga balat at mukha nila. Pero wag ka, pagkatapos ng ilang araw e puro tagiyawat at pula pa rin ang mga mukha.

8. Eto classic, na ngayon ay may patalastas na sa TV. Pag daw umaaraw at umuulan ay may ikinakasal na tikbalang. Bata pa ako kasabihan na ito sa amin.

O sya, yan na muna, maliligo muna ako at mainit na.